తెలుగు సినీ పరిశ్రమలో పంజాబీ అందం పూనమ్ కౌర్ గురించి ప్రత్యేకంగా చెప్పనవసరం లేదు. కొన్ని సినిమాలతోనే ప్రేక్షకులకు దగ్గరైన ఈ నటి, ఇటీవల ఇచ్చిన ఒక ఇంటర్వ్యూలో తన జీవితంలో ఎదుర్కొన్న కొన్ని భయంకరమైన, సంచలన విషయాలను బయటపెట్టారు. ఆమె చేసిన వ్యాఖ్యలు ఇప్పుడు సినీ వర్గాల్లో, సోషల్ మీడియాలో తీవ్ర చర్చకు దారితీస్తున్నాయి.
కడప వ్యక్తుల బెదిరింపులు: న్యూడ్ వీడియోల వార్నింగ్!
పూనమ్ కౌర్ వెల్లడించిన వివరాల ప్రకారం, ఒకానొక సమయంలో కడపకు చెందిన కొందరు వ్యక్తులు తనను బెదిరించారని తెలిపారు. ఒక ప్రముఖ నటుడికి వ్యతిరేకంగా ప్రెస్ మీట్ పెట్టి మాట్లాడాలని వారు తనపై ఒత్తిడి తెచ్చారని ఆమె చెప్పారు. మొదట డబ్బు ఆశ చూపారని, ఆ తర్వాత ఒక పదవి ఇస్తామని ప్రలోభపెట్టారని పూనమ్ కౌర్ వెల్లడించారు. అయితే, తాను వారి డిమాండ్లకు లొంగకపోవడంతో, తన న్యూడ్ వీడియోలను బయటపెడతామని బెదిరించారని ఆమె ఆవేదన వ్యక్తం చేశారు. ఈ విషయం తన కుటుంబ సభ్యులకు తప్ప మరెవరికీ తెలియదని, ఇన్నాళ్లూ తనలోనే దాచుకున్నానని పూనమ్ కౌర్ తెలిపారు.
పోసాని ప్రెస్ మీట్ వల్ల పెళ్లి ఆగిపోయింది: పూనమ్ కౌర్ ఆవేదన
తన వ్యక్తిగత జీవితంపై తీవ్ర ప్రభావం చూపిన మరో సంఘటన గురించి పూనమ్ కౌర్ ప్రస్తావించారు. వైసీపీ మాజీ నేత పోసాని కృష్ణ మురళి నిర్వహించిన ఒక ప్రెస్ మీట్ తన జీవితాన్ని పూర్తిగా తలకిందులు చేసిందని ఆమె భావోద్వేగంగా చెప్పారు. ఆ ప్రెస్ మీట్లో తన గురించి అసత్య ఆరోపణలు చేయడం, చెడుగా మాట్లాడటం వల్లే తన పెళ్లి ఆగిపోయిందని పూనమ్ కౌర్ వెల్లడించారు. అప్పటికి పెళ్లి చేసుకునే ప్రయత్నాల్లో ఉండగా, ఆ ప్రెస్ మీట్ తర్వాత ఆ సంబంధం పూర్తిగా దూరమైందని ఆమె పేర్కొన్నారు. ఆ ఒక్క ఘటనతో తన జీవితం చీకట్లోకి వెళ్లినట్టు అనిపించిందని, డబ్బు, పని అవకాశాలు, ఆరోగ్యం, సంతోషం, ఆశ… అన్నీ కోల్పోయినట్టుగా అనుభూతి కలిగిందని పూనమ్ కౌర్ ఆవేదన వ్యక్తం చేశారు. అదే సమయంలో తన తల్లికి గుండెపోటు రావడం, తాను చదువును మధ్యలోనే ఆపేయాల్సి రావడం వంటివి తనను మానసికంగా మరింత కుంగదీశాయని ఆమె తెలిపారు. దర్శకుడు దాసరి నారాయణరావు జీవించి ఉండి ఉంటే తనకు ఈ పరిస్థితి వచ్చేది కాదని కూడా పూనమ్ కౌర్ గుర్తు చేసుకున్నారు.
రాజకీయ ప్రయోజనాల కోసం తన పేరును వాడుకున్నారు
పూనమ్ కౌర్ పంజాబీ అమ్మాయి అయినప్పటికీ, తెలుగులోనే సినిమాలు చేసి ఇక్కడే స్థిరపడ్డారు. ఒక నటుడు కమ్ రాజకీయ నాయకుడితో తనను లింక్ చేసి, తరచుగా తమ స్వార్థ రాజకీయ ప్రయోజనాల కోసం తన పేరును ఉపయోగించుకునే ప్రయత్నాలు జరుగుతుంటాయని ఆమె అన్నారు. తాను ఏ రాజకీయ పార్టీకి చెందిన వ్యక్తిని కాదని, ఏ పార్టీతోనూ సంబంధం లేదని పూనమ్ కౌర్ స్పష్టం చేశారు. చేనేత వస్త్రాలపై జీఎస్టీ రద్దు కోసం తాను చేసిన కృషిని కూడా కొందరు రాజకీయ పార్టీకి చెందిన వ్యక్తిగా చిత్రీకరించారని ఆమె ఆవేదన వ్యక్తం చేశారు. తన పెళ్లి, అబార్షన్, రహస్య పిల్లలు, రాహుల్ గాంధీతో అఫైర్ వంటి పుకార్లను సృష్టించిన మీడియాకు ధన్యవాదాలు అని ఆమె వ్యంగ్యంగా వ్యాఖ్యానించారు.
